مين اللى عاقل فينا ، مين مجنون !!

قريت مرة فى رواية لـ باولو كويلو  أسمها "فيرونيكا تقرر ان تموت" جملة نسيتها دلوقتى _ لو أفتكرتها هاكتبها بعدبن _
 بس الجملة دى أوحت ليا  بأن اللى بيميز المجنون عن العاقل انه بيتحرر من خوفه، فبيعمل كل حاجة ممكن تخطر ع باله،  قصاد ان العاقل بيفضل دايما اسير خوفه، فبتفوته تقريبا كل متع الحياة اللى بيخاف يعملها،
وبالتالى فان الموضوع نسبى و اصبح مش مفهوم مين فيهم المجنون ومين العاقل،
هل العاقل اللى بيفضل مقيد طول الوقت ولا اللى بيعمل كل حاجة بعد ما بيحرر عقله م الخوف.

سؤال صعب أو يمكن بتهيألى

 جبران خليل جبران قال "الرغبة نصف الحياة أما عدم الإكتراث فنصف الموت"
السؤال بتاعى له علاقة بالجزء الأول من الجملة الرغبة نصف الحياة ، ويمكن يكون مرتبط بباقى الجملة بشكل أو بأخر.
هو احنا ممكن  نعيش من غير رغبات، من غير ما يكون عندنا حاجات عايزنها،  طب دا هيبقى أفضل ؟!!!
 يعنى ممكن يكون حاجة كويسة من ناحية انه كل ما رغبات الأنسان بتزيد وساعات كتيييييييييير بسبب ضغوط الحياة او ظروف خارجة عن ارادة الانسان يبقى مش قادر يحقق رغباته دى ، وممكن لو حققها تبقى ناقصة فما تحققش له السعادة الكاملة اللى بينشدها ، وبالتالى ممكن يبقى تعيس وبالتالى بردو يبقى الشخص اللى مش عنده رغبات أو احتياجات هيكون افضل حالا من الشخص البائس اللى مش عارف يحقق رغباته.
بس من ناحية تانية هو  هيبقى ايه معنى الحياة ؟!! لو الانسان معندوش حاجات عايز يحققها وبيسعى فى حياته لده؟! طب ازاى هيحس انه عايش لو عاش من غير مايكون حاسس انه عايز يعيش ودى ابسط رغبة ممكن انسان حى يحتاجها. 
انا بقول اى كلام تقريبا كدا، أو بفكر بصوت عالى.


 من وحى فيلم "Before Sunset"  .