أحلى صحبة والله يا ريم

لو حبيت أأرخ الفترة دي من حياتي لازم احطلها العنوان دا "أحلى صحبة والله يا ريم"، تحديدًا عشان الفترة دي من حياتي هي أكتر مرة اتعلق بألبوم بالشكل دا، وعشان الفترة دي اكتر وقت حسيت -واللى مش شرط يكون احساس حقيقي، اكمن البني أدم مننا بيحب يحس حاجات ويبني عليها خيالات من مفيش اصلا- فيه بالهجر والنبذ والوحدة، وريم خشيش في ألبوم "هوى" بتغني عن الهجر وبتلوم حبيبها في أغلب الموشحات عشان سابها لوحدها.

الكهربا تقطع من هنا اقوم مشغلة الكشاف وريم ع الموبيل وادخل اعمل أي شغل بيت كنت مكسلة اعمله والكهربا موجودة، أو أدخل البلكونة وانام ع اﻷرض فوقي السما والنجوم وانا لازقة وشي في السيراميك عشان احس بالسقعة اللى فيه، وريم بتغني في الخلفية، دا غير الوقت اللى بسمع فيه اﻷلبوم وانا في الموصلات ورايحة الشغل الصبح أو وأنا في الشغل.

https://soundcloud.com/hilalchouman/hilalan

اغنية يا هلال تحديدًا بدندنها بشكل مش طبيعي، اللى مش فاهماه فعلا التأثير اللى بتعمله اﻷغنية دي فيا، انو يعني على الرغم من أنها بتناجي حبيبها فيها، وبتشتكي من هجره اللى من غير سبب، يعني تبدو للي ما سمعهاش مأسويات وكدهون، لكن بتبهجني جدا، بمجرد ما المزيكا بتاعتها تبدأ ببتهج فشخ.

عمومًا يعني ممكن اجازف واقول ان وسط العك اللى انا فيه كله الفترة دي، ريم وألبومها "هوى" أحلى حاجة موجودة حاليًا، اللهم دِمها نعمة.

رمضان، صيف 2014